2021 жылғы 15 қарашада Қазақстан Республикасы Президентінің жанындағы Мемлекеттік басқару академиясының Жамбыл облысы бойынша филиалында бірқатар жергілікті атқарушы органдардың мемлекеттік қызметшілеріне және Жамбыл облысының жобалық басқару және цифрландыру орталығы қызметкерлеріне арналған «Жобалық менеджмент: ISO 21500 сертификациясына дайындық» тақырыбындағы біліктілікті арттыру семинары өз жұмысын бастады. Семинардың ашылуына Жамбыл облысының әкімі Б.М. Сапарбаев, пен академия ректоры Е.Қ. Әбіл, және Жамбыл облысының мемлекеттік органдарының әртүрлі деңгейдегі басшылары қатысты.
⠀
Мемлекет басшысының «Халық үніне құлақ асатын мемлекет» тұжырымдамасын тілге тиек ете отырып: «мемлекеттік қызметкер халыққа жақын болуға, сындарлы диалог орната алуға міндетті. Азаматтардың барлық өтініштеріне жедел әрі тиімді жауап беруге тиіс. Немқұрайлылық пен жауапсыздыққа жол берілмеуі керек. Басшылар қағазбастылықтан арылып, азаматтардың мәселелерін жедел шешуі қажет», – деп атап өтті облыс әкімі.
⠀
Семинардың ашылу салтанатынан кейін академия ректоры Е.Қ. Әбіл «Жобалық менеджмент: ISO 21500 сертификациясына дайындық» курсының тыңдаушыларына стратегиялық сессия өткізді. Сессия кезінде ректор қойылған сұрақтарға жауап беріп, курстың ерекшеліктерін түсіндірді.
⠀
Келесі кезекте, академия ректоры Е.Қ. Әбіл филиал ұжымымен кездесіп, ұжымның алдында тұрған міндет, мақсаттарын атап өтті. Ректор академияның мемлекеттік қызметтегі оң өзгерістерді қалыптастырушы миссиясы жайында сөз қозғай отырып, осы мақсатқа қол жеткізудегі жекелеген жұмыс бағыттарын, стратегиялық мақсаттарға жету мүмкіндіктерін, ақпараттық-ресурстық орталықтың «Мега-Про» электронды каталогын пайдаланудың аясын кеңейтуді тапсырды. Профессор оқытушылар құрамына мемлекеттік органдармен, білім ұйымдарымен ынтымақтаса отырып ғылыми-зерттеу жұмыстарын одан әрі жандандырудың және академияның әлеуетін дамыту мақсатында бастамалар ұсынудың маңыздылығы жайлы ой бөлісті.
Сондай-ақ, бүгінгі күні мемлекеттік қызметтің түрлі саласында еңбек етіп жүрген облыс аймағындағы Мемлекеттік басқару академиясының түлектерімен кездесу өткізді. Кездесу барысында түлектердің академиялық білімдерін аймақтың түрлі салаларын дамытуға пайдалану тетіктерінің әлеуеті жөнінде сөз қозғады.
⠀
Одан әрі ректор М.Х.Дулати атындағы Тараз өңірлік университетінің басшысы Т.І. Ешенқұловпен кездесіп, жобалық менеджмент курстарын ашу, академияның Жамбыл облысы бойынша филиалымен өзара тиімді ынтымақтастықта болу мәселелерін көтерді. Бұл жөнінде филиал басшысы Рауан Нұрғалиұлымен жұмыс барысы талқыланып білім сапасы, дуалды оқыту, түлектермен байланыс, ғылыми жобаларды дайындауға қатысты пікір алмасып, оларды шешу жолдары жөнінде бірқатар тапсырмалар берілді.
