2021 жылдың 24 қарашасында ҚР Мемлекеттік қызмет істері агенттігінің Жамбыл облысы бойынша департаментінің басшысы Ш.А. Сұлтанханның, ҚР Президентінің жанындағы Мемлекеттік басқару академиясының Жамбыл облысы бойынша филиалының директоры Р.Н. Садырқұловтың, Жамбыл облысы әкімі аппаратының әдеп жөніндегі уәкілінің міндетін атқарушы А.Ж. Көшербаеваның қатысуымен заң бұзушылықтардың алдын алу мақсатында жаңадан сайланып, филиалда білімдерін шыңдап жатқан 28 ауыл әкімімен кездесу өтті.
⠀
Ш.А. Сұлтанхан ауыл әкімдерін жауапты лауазымға сайланғандарымен құттықтай отырып, мемлекеттік қызметшілердің әдептілік құндылықтарына, қоғам мен Мемлекет басшысының сенімін ақтау, жергілікті халықтың мұң-мұқтажын қанағаттандыру жолында адал қызмет ету мәселелеріне жеке тоқталып өтті.
⠀
Жиын барысында Р.Н. Садырқұлов қазіргі таңда мемлекеттік органдардың халықпен ашық әрі тығыз байланыс орнату – мемлекет тарапынан қойылып отырған басты талаптардың бірі деп атап өтті. Айтылған талаптарға сай болу үшін мемлекеттік қызметшілер өзгелерге әділдігімен, іс-әрекетімен, білімімен, тәжірибесімен үлгі бола білуі керектігін атап өтті.
⠀
Іс-шара барысында мемлекеттік қызметшілерді қайта даярлаудың оқу бағдарламасының жаңашылдықтары, ауыл әкімдерінің әдеп жөніндегі уәкілдермен өзара іс-қимыл жасау жөнінде сөз қозғалды.
⠀
Бұдан бөлек, Агенттіктің Жамбыл облысындағы Әдеп жөніндегі кеңесінде қаралған жекелеген тәртіптік істерге, бұқаралық ақпарат құралдары мен интернет-ресурстарда мемлекеттік қызметшілердің әрекеттеріне қатысты жарияланған жағымсыз материалдарға қысқаша шолу жасалып, нақты мысалдар келтірілді.
⠀
Кездесу соңында ауыл әкімдерінің қойған сұрақтарына нақты жауаптар беріліп, олардың тілектері мен ұсыныстарының алдағы уақытта ескерілетіндігі айтылды.
