2022 жылғы 25-27 сәуір аралығында ҚР Президентінің жанындағы мемлекеттік басқару академиясының Жамбыл облысы филиалының ұйымдастыруымен Жамбыл облысының Байзақ, Жамбыл аудандарының әкімдіктері аппаратының қызметкерлерімен кездесулер өткізілді. Кездесуде Филиалдың жетекші сарапшысы Мәлік Назымбекұлы Асанов Академияға 2022 жылға магистратура мен докторантураның білім беру бағдарламалары бойынша оқуға қабылдаудың жаңа ережелері туралы толық ақпарат бере келе, Академияда оқудың артықшылықтары туралы баяндап берді. Сонымен қатар Академияның түлегі Жамбыл ауданы әкімдігінің ішкі саясат бөлімінің сектор меңгерушісі Сәуле Құрманбекқызы Тулекова өзінің Академияда оқып жүрген кезде алған білімі мен білігі туралы ой бөлісіп, Академияда алынған тәжірибе мемлекеттік қызметші ғана емес жеке тұлға ретінде де дамуға ықпал ететіндігін атап өтті. Кездесудің екінші жартысы қазір елімізде кеңінен қолға алынып жатқан Сыбайлас жемқорлыққа қарсы күрес саласындағы стандарттарды енгізу тақырыбына арналды. Филиал профессоры Бекмұхан Жұмаханұлы Ахметов аудандардың мемлекеттік қызметшілерін осы бір тың тақырыптың негізгі ұғымдарымен, жүйесімен таныстырып, сыбайлас жемқорлыққа қарсы менеджмент және комплаенс-қызметтің мемлекеттік органдардың қызметіндегі роліне қатысты құнды мәліметтер берді.
