Қазақстан Республикасындағы 2030 жылға дейінгі отбасылық және гендерлік саясат тұжырымдамасының негізгі бағыттарын жүзеге асыру бойынша 11-13 сәуір аралығында өткен «Мансап және отбасы: тепе-теңдікті қалай сақтау керек?» тақырыбындағы семинар тыңдаушылары аталған дәрісті жүргізуші филиал оқытушысы Т.Орынтаеваның жетекшілігімен салт-дәстүр және ұлттық құндылықтарды дәріптеп отырған «Анаға тағзым» орталығына барды.
⠀
Тыңдаушылар мемлекеттік қызметтегі мансапты өсіріп, басқару саласын меңгеруде отбасылық саясат пен гендерлік саясатты ұтымды ұштастыру жолдарын талқыға салып, әдет-ғұрыпты сақтаудың ұлтқа деген қызметінің маңызы туралы терең ойлармен бөлісті. Ана мен баланың сан түрлі қабілетін қалыптастырып, отбасындағы шешімі қиын мәселенің түйінін шешуде мұндай орталықтың үлкен рөл атқаратын маңызы түсіндірілді.
⠀
Сондай-ақ, ұлтты қалыптастырудың алғашқы қызметшілері – аналарға арналған осындай орталық «барлық аудандарда, қалаларда бой көтерсе» – деген тілектер айтылды. «Әсем ғимаратымен ерекше сезімге бөлейтін, жылылығы жан шуақтандыратын мұндай орталық тек аналар емес әкелерге де арналған болса, отбасылық саясаттағы тепе-теңдік мәселесінің шешілген бір шешімі болар еді…» – деген пікірлер де айтылды.
