Жамбыл облысында қайта даярлаудан өткен мемлекеттік қызметшілер 274-ке жетті. Оның ішінде орталық мемлекеттік органдарда еңбек ететін 31 қызметкер бар. Ал жергілікті атқарушы органдарға қарасты мемлекеттік қызметшілер саны – 243.
Бұл туралы ӨКҚ баспасөз брифингінде Президент жанындағы Мемлекеттік басқару академиясының аймақтағы филиалының директоры Рауан Садырқұлов айтты. Оның мәліметінше, біліктілігін арттырудан 1 083 мемлекеттік қызметші өткен. «Былтырғы сәуір-маусым айларында академияның барлық филиалдары жаңадан қабылданған Әкімшілік рәсімдік-процестік кодексінің негізгі ережелерін түсіндіру бойынша 16 сағаттық оқытулар ұйымдастырды. Дәрістерді алдын-ала дайындықтан өткен әділет органдарының және жоғары оқу орындарының тәжірибелі заңгер-мамандары жүргізді. Оған облысымыздағы барлық жергілікті атқарушы органдардан 2 319, ал орталық мемлекеттік органдардың жергілікті бөлімшелерінен 1596 қызметші қатысып, тиісті үлгідегі куәліктерін алды», – деді спикер.
Рауан Нұрғалиұлы 2021 жылдың 25 шілдесінде Қазақстанның тарихында алғаш рет ауыл әкімдерінің тікелей сайлауы өткенін еске салды. Осы науқанда сайланған 28 ауыл әкімі 8-26 қараша аралығында өз біліктіліктерін арттырған.
