19-20 қазан 2020 жыл ҚР Президентінің жанындағы Мемлекеттік басқару академиясының Жамбыл бойынша филиалында «Парасаттылық. Сыбайлас жемқорлыққа қарсы мәдениет» біліктілікті арттыру семинары өтті.
Семинар-тренинге Облыстық ауыл шаруашылық басқармасы, Облыстық туризм басқармасы, Дін істері басқармасы, Облыстық денсаулық сақтау басқармасы, Облыстық білім басқармасы, Облыстық денсаулық сақтау басқармасы, Жамбыл облысы бойынша Әділет департаменті бас мамандары мен бөлім басшылары, ауылдық округтер әкімдерінің орынбасарлары, ауылдық округ әкімі аппаратының бас мамандары қатысты.
Қазақстан Республикасында жүргізіліп жатқан сыбайлас жемқорлыққа қарсы іс-қимылдардың негізгі бағыттарының бірі – сыбайлас жемқорлыққа қарсы мәдениетті қалыптастыру. Берілген мәселе семинар барысында ел азаматтарының парақорлыққа төзгісіздігінің нөлдік деңгейіне қол жеткізу мүмкіндіктерін талқылау арқылы қарастырылды. Мемлекеттік қызметте жемқорлыққа жол бермеудің басты факторы ретінде парасаттылық құзыреттілігін дамыту мазмұны интерактивті жаттығулар, кейс-тапсырмалар арқылы талқыланды.
Семинар лейтмотивін ұлы ғұлама Әл-Фарабидің «Бақыттың мәні — парасаттылықта, әркімнің өз алдына игілікті мақсат қоя білуінде… адамның өз мінез-құлқын, іс-әрекетін ерікті түрде өзгертіп, игілікке бағыттап отыруында» тағылымы құрады. Кәсібилік кісілікпен астасқанда мемлекеттік қызметкерлердің рухани болмысы шыңдалатыны, оның салдары танымның аса маңызды бастауы – парасаттылыққа әкелетіні талданды. Парасаттылық – мемлекеттік қызметкерге тән кәсіби құзыреттіліктердің көшбасшысы. Жаратылысқа тек көзімен көргені бойынша баға беретіндер болмыстың астарын түсініп жарытпайды, ал болмыс атаулыға парасат назарымен үңілгендер кез-келген құбылыстың астарынан мағына таба алады. Демек, парасат пайымы тыңдаушылардың ішкі мазмұнды сезіп-түйсінулерін, себеп-салдарлық байланыстарды терең ұғынуларын және рухани құндылықтарының артуын тудырады. Семинардың дамытушылық мәні де осы – тыңдаушылардың бойына сыбайлас жемқорлыққа қарсы мәдениеттің негіздерін сіңіру; ал оқу мақсаты – ұйымдарда сыбайлас жемқорлыққа қарсы әрекет ету менеджменті жүйесін және сыбайлас жемқорлыққа қарсы комплаенсті құру тетіктері туралы білім кешенін қалыптастыру.
Семинар соңында тыңдаушылар МБА және филиал басшылығына, сыбайлас жемқорлыққа қарсы іс-қимыл мәселелерін зерделеу жөніндегі зерттеу орталығының сарапшысы Айбек Қабылдинға, МБА ЖФ профессоры Махаббат Оспанбаеваға, оқытушы Тәттігүл Орынтаеваға жылы лебіздерін білдірді.
